Најчести се сликите на платно особено тие што се „масло на платно“ кога станува збор за сликање, но тоа не значи дека платното е единствената можна позадина за маслени и акрилни бои. Вистина е дека платното е најпопуларно, а причината за тоа е неговата долготрајност и издржливост, леснотијата при транспортот и прикачувањето. Сепак, меѓу сликарите има такви чиј начин на работа бара различна позадина, има и такви чии идеи не ги задоволува рамната површина на едноставна форма, а некои едноставно сакаат да создадат дела што се истакнуваат затоа што се наоѓаат на необични материјали.
Без оглед за што станува збор, сликата има задача да трае. За да се обезбеди оваа издржливост, важно е да се земат предвид сите правила поврзани со самата слика, но она што може да биде уште поважно e да се почитуваат правилата за подготовка на подлогата и кои подлоги се генерално соодветни за сликата да се наслика на нив. Неправилно подготвената површина може да доведе до помали проблеми како мат боја, што е резултат на премногу абсорбирачка подлога и ова ќе го забележите за време на работата, но може да доведе и до пукање и лупење на обоени слоеви, што е сериозен проблем што нема да можете лесно да го решите. Најверојатно, дури и нема да се појави за време на процесот на сликање, но ќе ви овозможи да ја завршите сликата и да се појави неколку месеци или дури неколку години подоцна.
Сликање на дрво
Со сигурност знаеме дека меѓу вас има луѓе кои би сакале да експериментираат, да излезат од клишеата и да сликаат на капаци од дрвени кутии, стиропор или камен и не се сигурни дали е тоа во ред и каков материјал е потребен за подготовка, a знаеме бидејќи не имате прашано. Ќе се потрудиме да одговориме на вашите прашања и да ве потсетиме на уште неколку важни чекори при избор и подготовка на позадина за сликање. По платното, најпопуларната подлога за сликање е дрвото, така што заслужува најголемо внимание, и затоа тоа ќе биде темата денес.
Дрвената подлога може да биде во различни форми - како табла изработена од цврсто дрво или алтернативи во форма на лесна плоча, МДФ и иверица, кои се полесни за наоѓање и финансиски поповолни. Исто така, позадина за вашата слика може да биде дрвена табла што ќе стои самостојно, или сликата ќе биде дел од мебелот (често се слика капакот на дрвена кутија, часовници или столови). Како прво, мора да го одберете дрвото паметно - ако сакате да сликате на класична табла, тоа мора да биде суво и пожелно е да е составено од неколку парчиња со посебна техника за да не се витка со текот на времето. Такви табли ќе најдете на пазарот главно како табли за икони.
Кога ја имате потребната димензија, најдобро е да залепите парче измиена памучна / ленена ткаенина над дрвото или некој од таблите со лепак за дрво или со акрилен гел-медиум, внимавајќи многу да не се заробат воздушни меури помеѓу дрвото и платното. Со лепење на платното, ја осигурате стабилноста на подлогата и избегнувате можно пукање на слоевите боја. Платното што сте го залепиле откако ќе се исуши, може да се третира како обично платно на рамка- премачкајте го со слој дрвофикс или акрилно средство за врзување, а потоа нанесете неколку тенки слоеви на прајмер / gesso, оставете го секој слој да се исуши пред да го нанесете следниот и ишмирглајте го со најфината шмиргла ако сакате исклучително мазна површина. На вака подготвената табла, можете да сликате со темперни, акрилни или маслени бои.
Украсување дрвени површини
Се разбира, кога сакате да насликате парчиња дрвен мебел платното не може да биде решение. Во овие случаи, тоа дури не е ни потребно бидејќи претежно се сликаат помали површини и обоени слоеви се појавуваат само на неколку места. Она на што треба да обрнете внимание во овие случаи е само дрвото.
Бидејќи честопати сакаме да преуредиме парче стар мебел, првиот чекор во подготовката на дрвената површина треба да биде проверка дали има мувла и отстранување на истата со алкохол или оцет. Исто така, проверете дали има стари слоеви на испукана и излупена боја - тие треба да се отстранат што е можно повеќе со шпатула затоа што ќе паднат порано или подоцна, затоа не ризикувајте да изгубите дел од вашата насликана декорација во која сте вложиле време и енергија. Потоа, сè треба да се исшмиргла убаво за да се изврши преминот помеѓу деловите каде што сè уште има боја и оние каде што бојата паднала, а потоа е потребно да се отстрани целата прашина со четка или раствор на вода и детергент ако наслагите се посериозни.
Кога имате чиста и целосно сува дрвена површина пред вас, мора да проверите и дали дрвото е претходно третирано со нешто, дали има слоеви на боја или лак и дали станува збор за бои на акрилна основа или на база на масло и растворувач. Следете го правилото дека можете да сликате со акрилни бои, но не е препорачливо да се слика или да се мешаат акрилни и производи на база на вода со бои на база на масло, бидејќи тие можат да се излупат. Ако нема стари слоеви, веќе можете да започнете да сликате со акрилни бои – површината не мора да ја премачкувате со прајмер ако сакате да ја зачувате бојата и видливата структура на самото дрво, но мора да го заштитите со лак по завршувањето. Друга опција е да нанесете прајмер во еден или неколку слоеви (во зависност од покривноста на бојата и колку сакате да биде мазна површината), а потоа можете да нанесете акрилната боја во нијансата што ви треба и на крај да сликате со маслени или акрилни бои.
