Врз основа на тоа со што се поврзани пигментите во нив пастелите можат да бидат маслени или суви. А потоа ќе ги поделиме според степенот на квалитет, односно според тоа дали се наменети за професионалци или почетници, дали се меки или тврди, во молив или стапчиња. Значи, сосема доволно поделби за да се збуни некој кој прв пат се среќава со овие средства за цртање. Секој од нив ќе даде различни резултати и можеби бара различна подлога, па доколку планирате да се впуштите во инвестирање во пастели и работа со нив, би било добро да се запознаете со типовите, разликите и можностите.
Видови на пастели
Како што веќе споменавме, основната поделба е на суви и маслени пастели. Сувите оставаат трага во прав и полна линија, додека маслените оставаат мрсна трага и можеме да ги споредиме со восочни боички што сите сме ги користеле како деца. Понатаму сувите пастели ги делиме на меки или тврди (soft - hard) и јасно ви е дека меките пастели ќе остават „помека линија“ и дека полесно ќе ги намачкате на хартија. Исто така, пастелите можете да ги најдете и во облик на стапчиња и во моливи - во зависност од тоа дали ви требаат за детали или големи површини (уметниците обично ги комбинираат).
Што го дефинира квалитетот на пастелите
Најдобра страна на работата со пастели е тоа што ќе добиете богат цртеж или дури и слика но без четки за сликање, разредувачи и палети. Значи само пастели, хартија и вашите прсти. Бидејќи се направени од суви пигменти со мал додаток на други материи кои се овде за да им ја чуваат формата, пастелите оставаат јасна и силно обоена линија или површина. И покрај фактот што нивниот состав, изглед и употреба се многу едноставни, даваат широки можности.
Што се однесува до нивните разлики во квалитетот и тоа како да го изберете вистинскиот производител и вистинската серија на пастели треба да знаете дека можете да ги купите во два степени на квалитет: artist (наменети за професионалните уметници) и student (наменети за учениците и студентите кои се во фаза на вежбање). Пастелите кои се наменети за професионалците имаат повеќе пигменти во себе што значи дека ќе оставаат поинтензивни, појаки траги, а поради поквалитетните пигменти и составот воопшто, нивното времетраење на хартијата е подолго. Пастелите наменети за ученици се значително поповолни бидејќи се направени од поевтини пигменти, содржат повеќе филери (прав материјали) и повеќе врзива, па затоа нивните траги се со помал интензитет. Меѓутоа, тие исто така имаат предности - нема да се скршат лесно и да се трошат како пастелите наменети за уметниците.
Бои
Пастелите можат да се мешаат на самата хартија со нанесување на една нијанса преку друга, а со оглед на тоа дека се во цврста состојба не можете да постигнете така голема палета на нијанси како што можете со течните бои. Затоа производителите нудат голем избор на нијанси како компензација за таа нивна мана. Ако не сте подготвени да инвестирате во голем сет со многу нијанси, најдобро е постепено да почнете да купувате поединечни бои и така сами да направите сет а боите да ги прилагодете на својот сензибилитет. Немојте да се изненадите доколку наидете на пастели чија цена драстично отскокнува од останатите а разликата е само во бојата, во прашање се природните пигменти и некои од нив се потешко достапни па и поскапи. Во студентските варијанти обично наместо скапите пигменти се наоѓаат нивни поефтини замени.
