Честа тема меѓу професионалните сликари и оние кои со сликарството се занимааваат како хоби е штетноста на маслените бои. На едни им пречи остриот мирис кој и тоа како се приметува во студијата каде што се слика со маслени бои, на други не им се допаѓа идејата да работат со токсични материјали генерално. Меѓу сликарите има и бремени жени, на некои од нас децата или милениците им трчкаат околку штафелајот додека сликаме, а некои едноставно се трудат да живеат здраво. Па, дали маслените бои се нешто што треба да се избегнува или не?
Мирисот на маслените бои
Кога луѓето зборуваат за мирисот на маслените бои, тие всушност говорат за мирисот на терпентинот кој се користи за разредување на боите и за чистење на четките. Самата маслена боја не мириса на ништо, можеби ќе осетите единствено благ мирис на масло. Таа не е опасна се додека не ја јадете, иако, кај повеќето од нив нема да се случи ништо страшно и ако ги изедете (тоа, се разбира, не е препорачливо). Направени се од масло и пигменити и скоро сите тие се безбедни, внимателни треба да бидете ( во смисла да не ги вдишувате и да не ги внесете со храна) само со оловно белата боја, кадмиум и кобалт.
Значи, се додека после сликањето уредно ги миете рацете, немате причина за грижа. Токсичните метали во некои бои навистина не се опасни ако ги користите умерено, но ако не сакате да размислувате за тоа, можете едноставно да ги заобиколите при купувањето и да користите алтернативни варијатни. На пример, наместо оловно бела или кадмиум боја, можете да користите нивни синтетички замени.
Дали испарувањата на терпентинот се штетни?
Единствен ризик од отровни супстанци е во растворувачите и медиумите кои се користат со маслените бои. Значи, испарувањата од терпентионт се лоши за вашето здравје. Со оглед на тоа дека без нив речиси и не се може, морате да најдете начин ваквите течности да ги користите паметно, да го држете капакот затворен а прозорците отворени. Некои уметници ги користат секој ден без да приметат штетни последици, но секогаш слушајте го својот организам бидејќи може да ви се случи некој терпентин од одреден производител да не ви одговара, а друг да можете да го користите најнормално. Ако забележите некои промени како вртоглавици или мачнини додека сликате и после сликањето, шишето терпентин или друг растворувач кој го имате користено во таа прилика сепак одложете го или подарете го некому кому ќе му биде од корист, бидејќи вам, дефинитивно не ви е.
Кога сакате во потполност да ги избегнете штетните испарувања, можете да бирате медиуми без растворувачи во себе или едноставно да земете маслени бои кои сами по себе се потечни и за кои разредување често не е потребно. Такви се на пример, Rembrandt боите. Исто така, избегнете безпотребно изложување на штетни материи така што четките ќе ги миете надвор, на отворено, а во текот на сликањето можете само да ги бришете со крпа или марамчиња, па така нема да морате на масата да држите отворена тегличка со терпентин.
Токсичност на лаковите
Сликата потребно е и да ја лакирате, како што советуваат реставраторите. Но повеќето лакови во себе содржат растворувачи што значи дека и нивните испраувања се штетни, па ако сакате својата слика да ја лакирате секогаш тоа правете го на отворено или барем со отворени прозорци, а потоа просторијата добро проветрете ја. Бидете паметни и трпеливи при купувањето и избирајте лакови со низок степен на токсични испарувања и мириси. Во краен случај, можете да се одлучите да не ги лакирате своите слики, некои од сликарите тој чекор го избегнуваат бидејќи просто не им се допаѓа како изгледа лакирана слика.
Маслени бои кои се раствораат со вода и нивните добри страни
Кога не сакате да се откажете од маслените бои а мирисот на терпентин и се нездраво што со себе носи ви смета, можеби маслените бои кои се раствораат со вода како оние од серијата Cobra на брендот Royal Talens се добро решение за вас. Кога ги користите нив користените четки чистете ги само со вода, а за разредување на боите и други ефекти постојат посебно направени медиуми кои се исто така без растворувачи во себе, а и сликата би ја лакирале со лакови од оваа серија. Голем број на сликари успешно и со задоволство работат со вакви бои, што ни зборува дека самото нивно постоење е оправдано. Генерално, доколку сакате да дознаете многу повеќе за ваквиот тип на маслени бои, можете да прочитате на една од нашите статии каде многу подетално се занимаваме со оваа тема.
Сè на сè, многу е лесно да се избегнуваат сите токсични материи, така да тие не би требало и не смеат да бидат причина за да бегате од маслените бои. Тука има две основни правила : првото е да не заборавите да го вратите капачето на шишето кога користите терпентин или други разредувачи, а другото е да ги користите умерено и редовно да ја проветрувате просторијата во која сликате. Како што видовте, постојат и начини да избегнете било каков контакт со нив. Истражете, сигурно во разговор и размена на искуства со други сликари ќе наидете на начин кој ќе ви допушти да сликате со маслени бои и максимално да уживате во тоа.
