Знаеме дека повеќето сликари сè уште сакаат докажани и вообичаени подлоги, како што се платно, картон и евентуално дрво, но зошто да не пробате нешто поразлично, зошто да не експериментирате и можеби да се пронајдете себеси а и вашата уметност на сосема друга страна?
Хартија и картон како подлога за слика
Покрај тоа што можете да купите специјално изработена хартија за маслени и акрилни бои, со акрилни бои можете да сликате и на било која подебела хартија без претходна подготовка или откако ќе ја премачкате со еден до два слоја акрилен прајмер. Потенки хартии ќе се насоберат за време на нанесувањето и сушењето на боите, па затоа не се препорачуваат.
На пазарот ќе најдете веќе подготвени картони за сликање со маслени и акрилни бои. Тоа се всушност лесонити со залепено платно и на таква подлога сликата може да изгледа доста успешно.
Стакло и порцелан
Стаклото и порцеланот не бараат посебна подготовка бидејќи станува збор за стабилни и не-абсорбирачки материјали. Најважно е добро да се измијат со детергент и вода, да се избришат со алкохол или пак да се измијат со раствор од оцет и вода за да може бојата добро да се нанесе. Откако предметот ќе се исуши целосно може слободно да сликате со бои за стакло.
Може да сликате и со акрилни и маслени бои но за подобри резултати премачкајте го предметот со прајмер а како завршен слој нанесете лак за заштита на боите од лупење.
Сликање на ѕид
Насликаните делови на ѕид ги нарекуваме мурали. Најчесто, ваквите дела се изведуваат со акрилни бои или со бои за ѕид кои се на база на вода. Подготовката зависи од состојбата во која се наоѓа ѕидот.
Не е добро да започнете да сликате на ѕид кој има влага, ниту пак на ѕид од кого се лупат старите слоеви на боја. Пожелно е ѕидот да има завршен фин слој на глет маса и да биде чист и исфарбан.
Метал и пластика како сликарски подлоги
Кога нанесувате прајмер или било која боја на метални или пластични предмети мора да земете во предвид колку предметот е мазен, односно сјаен. Кај предметите со особено мазна површина бојата има тенденција многу брзо да се брише и да се лупи по сушењето, па затоа треба површината прво да ја исчистите со шмиргла за да стане погруба а и за бојата да има што да „фати“.
Стиропор како подлога за сликање и декупаж
Најважното нешто што треба да се знае е дека никогаш не треба да нанесувате производи на база на растворувачи директно на површини од стиропор (кога не сте сигурни, ќе ги препознаете по нивниот остар мирис) - па поради тоа најдобро е да работите директно на стиропор само со акрилни бои.
Доколку имате посериозна идеја што бара употреба на различни бои, најдобро ќе биде да залепите парчиња потенка хартија. По сушењето на овој слој од хартија искористете на пример паста за да добиете идеално мазна површина (нанесете неколку тенки слоеви, шмирглајќи го секој слој пред нанесување на наредниот).
