Ги среќавате претежно во надворешноста - еден од начините да се игра со монотоните sидови на зградите или да се испрати јавна, видлива порака до сите преку уметноста, се всушност мурали. Сепак, сè почесто може да ги сретнете во модерни ентериери, каде нивната цел е да го направат просторот посебен и импресивен, а има сè повеќе луѓе кои се осмелуваат да дизајнираат и насликаат дел или целиот ѕид во нивниот дом. Дали вие би се осмелиле?
Од каде да се започне? Од идеја…
Кога одлучивте дека боите на ѕидот во вашата днева соба, спална или работна просторија се она што недостасува, а сигурни сте дека не сакате класична слика на платно која ќе ја закачите на ѕид, ниту пак тапет или налепница, тогаш потполно е јасно дека ви треба мурал.
Не грижете се премногу за сликањето, постојат многу начини да се направи процесот полесен и побрз но посветете доволно време на планирање затоа што тоа е клучот за успехот во овој случај. Пред сè, размислете за боите што ќе бидат застапени на таквата слика, прилагодете ги на просторијата и нејзината намена. За мурали во спални соби избегнувајте светли бои, силни контрасти и изберете смирувачки топли нијанси, додека за работниот простор треба да изберете детали во позитивни бои кои ќе ги мотивираат вашите соработници и вас (портокалова, сина, зелена).
Мотивот или темата не мора да бидат вообичаени, нека биде нешто што е ваш заштитен знак во апстрактна форма, или дрво како симбол на родот или испреплетени едноставни форми како кругови и квадрати.
Реализација на мурали
Скица на мал формат е првата задача - обидете се да ја направите во добра големина, иста форма како и вашиот ѕид или дел од ѕидот што сте планирале да го насликате. Најдобро е ѕидот да биде рамен и мазен, а можете да го обоите во боја што ќе биде доминантна на муралот за да ви ја олесни работата. Скицата можете да ја пренесете на ѕид со слободна рака, цртајќи ги само најважните линии со графитен молив.Не ги правете линиите премногу силни, бидејќи потоа ќе имате проблем со бришењето на места каде што нема да бидат покриени со боја.
Потребен материјал
Бои - предлагаме да користите акрилни бои кои се лесни за употреба, добро се однесуваат на оваа површина и нема да ја менуваат бојата кога ќе се исушат, како што обично се случува со класичните ѕидни бои. Малку потешка задача ќе биде да одредите колку боја ви е потребна, но не можеме да ви помогнеме затоа што тоа зависи од вашата скица и дали тоа е само цртеж или целата површина ќе биде исполнета. Колку боја користите, зависи од самиот ѕид - ако структурата е погруба, ќе ви треба повеќе боја отколку ако е целосно рамна.
Четки и сунѓери - Секако, бирајте четки за подлога за да не изгубите волја и трпение а на самиот крај земете тенки четки. Она што може да ви помогне се сунѓерести ваљаци и сунѓерести четки со кои ќе се забрза целиоот процес и со нивна помош можете да создадете меки прелази со боите.
Шаблони - Големо олеснување во ваквите работи. Можете да ги купите доколку ви се потребни некои специфични облици, а за прецизни линии и граници послужете се со сликарска трака. Преку шаблонот бојата може да ја нанесете со сунѓер, а можете и со скрилни бои во спреј.
Совети:
Заштитете го подот и мебелот од прскање.
Не започнувајте да сликате без детална скица и план, бидејќи не можете да ги избришете акрилните бои од ѕидот. Единствениот начин да се врати ѕидот во првобитната состојба е фарбање.
Внимавајте да не ставате дебели слоеви при сликање. Кога ќе го исфарбате ѕидот после неколку години, релјефните наслаги од бојата ќе останат видливи, така што ќе бидете принудени повторно да го измазнете ѕидот.
Изградете слика од слоеви за да изгледа попрофесионално и побогато. Не брзајте, посветете неколку дена, па дури и една недела на вашата работа доколку е потребно.
Чувајте го вашиот мурал подалеку од чад од тутун и гасови од кујната за да уживате во него што е можно подолго.
