Четките за сликање се Вашиот најверен сојзник и најважниот алат додека сликате. Не е лесно да ги изберете вистинските четки, не е лесно и да ги набавите сите кои Ви се потребни а Вашиот џеб да не се побуни. Но, кога веќе ги имате вистинските, многу е важно да посветите време и трпение на нивното чистење и нега. Морате да навикнете чистење на четките да биде составен дел од процесот на сликање и никако не смеете да пропуштите а да не ги исчистите на крајот.
Чистењето на четките после сликање со акрилни бои не одзема многу време, но за оние кои сликаат со маслени бои овој процес е малку подолг, бара поголема подготвеност и пред се трпение. Исто така, помала количина на различни средства за чистење е потребна за акрилните бои. Ако работите со маслени бои, се препорачува во Вашето ателје или простор да имате дел со средства подготвен за чистење на четките. Ставете стари весници на подот за да не го испрскате со боја и бидете фокусирани исклучиво на тоа да ја отстраните целата боја од четките. Нека сите средства Ви бидат при рака и спремни за користење. Па, да почнеме:
1. Терпентин или разредувач
Набавете средство за чистење (кај маслените бои не помага никако само сапун и вода) – терпентин или разредувач. Купувајте паметно без да претпоставувате затоа што го ризикувате Вашето најважно помагало – четките. Можете да ги набавите во мали или големи пакувања. Купувајте како повеќе ќе Ви се исплати,но при користењето ќе Ви треба уште еден сад во помал обем кој може да се затвори за да можете остатокот да го искористите наредниот пат.
2. Течен сапун
Сапунот не е доволен, но и тој ќе Ви биде потребен. Нека тоа биде течен сапун, ќе Ви послужи и сапунот што го користите за миење на рацете, а можете да набавите и посебен течен сапун за чистење на четките.
3. Весници
Пред употребата на разредувач или сапун, земете стари весници(истата работа може да се заврши со хартиени салфеки, само да бидат што подебели дури и со пешкири). Со едната рака држете ја рачката на четката, а со другата замотајте го весникот околу металниот држач на влакната. Притиснете ги влакната што е можно посилно и повлечете го весникот на горе, од металниот држач накај врвот на влакната. Повторете ја постапката додека не ја отстраните целата боја која може да се отстрани на овој начин.На крајот треба да имате повеќе боја на весникот отколку на влакната. Најмногу труд вложете да ја отстраните бојата на почетокот на металниот држач за влакната затоа што бојата таму се таложи и ако не ја отстраните може да го оштети и држачот и влакната.
4. Начин на примена на разредувач или терпентин
Следниот чекор е да ја ставите четката во сад во кој претходно сте ставиле терпентин или разредувач. Не ставајте премногу , веќе рековме дека садот треба да биде со мал обем, а средството да биде на иста висина како должината на влакната на четката. Поминете низ дното на садот додека полека од четката се ослободува бојата.
5. Отстранување на вишокот на течност
После некое време, повторно земете весник и повторете ја постапката со притискање како пред да ја натопете четката во разредувач или терпентин. Сега уште побитно ќе Ви биде површините околу Вас да бидат заштитени затоа што четката апсорбира доволно течност. Наскоро ќе приметите дека се подобро се гледа оригиналната боја на влакната.
6. Примена на сапун
За да го отстраните и последниот слој на боја, време е да употребите сапун. Ставете мала количина течен сапун на Вашата дланка( нема да биде лошо доколку пред тоа ставете ракавици за еднократна употреба), а потоа истријте ја четката. Оваа постапка повторете ја неколку пати. Правете го тоа се додека сапунот не престане да прима боја дури тогаш четката ќе биде сосема чиста. Имајте на ум дека со текот на времето време четките ќе примат од бојата која ја користите и нема да можете целосно да ја отстраните. Затоа потпрете се на бојата на сапунот, кога тој ќе ја задржи оригиналната боја , ќе знаете дека четката е добро исчистена , без оглед на тоа како изгледаат влакната. И не грижете се тоа што влакната трајно задржале некоја боја нема да влијае на резултатите кои ќе ги постигнете со четката ниту е знак дека Ви треба нова.
7. Завршно чистење
Исплакнете го сапунот од влакната на четките и уште еднаш искористете ги весниците, овој пат да ја исцедите целата вода. Тоа е крајот на спа третманот на Вашите четки. Оставете да се исушат по можност во хоризонтална положба.
Колку и да паѓате во искушение после напорниот ден да го оставете чистењето на четките за наредниот ден или малку покасно избегнете го тоа по секоја цена. Не е добро и влакната да ги оставете потопени во разредувач додека не најдете време да ги исперете затоа што така ќе ослаби лепакот кој ги држи влакната во држачот и значително ќе го намалете рокот на траење на четките.
