(En plein air - на воздух)
Во средината на XIX сликарите се осмелувале на вакви авантури. Не можеме да кажеме дека пред тоа немало обичај да се појде во природа со намера да се создава таму но тогаш обично настанувале само скици за идните дела или во ателјето се носела идејата од која подоцна се раѓала сликата. Импресионистите први умееле своите слики да ги започнаи и завршат во природа, да се борат со сонцето и сенките по цел ден, да трагаат по боите кои се менуваат секој час и да уживаат во таа борба. Го напуштиле ателјето со идеја за нешто сосема ново, светло сликарство, со идеја на платното веднаш да ги пренесат своите импресии од природата во која се наоѓаат, а помеѓу другото ги охрабрила и појавата на бои во туби ( до тогаш уметниците сами ги припремале од медиуми и пигменти - боја во прав, па не било така едноставно да се слика надвор).
Сликањето En Plein air (на воздух) сè уште претставува предизвик за голем број уметници, но ни се чини дека многу од нив заборавиле на убавината на создавање на отворено и на многуте големи дела кои биле создадени на овој начин. Ако немате навика да работите надвор ова би била добра причина да излезете од ателјето, да уживате во свежиот воздух и природата да ја набљудувате од сосема поинаков агол, а истовремето да ја проверите и подготвеноста на брзи потези и завршување на сликите во еден здив. Најголемата предност на сликањето En Plein air е тоа што сите ваши сетила се ангажирани и што на платното го пренесувате целото искуство од местото каде што се наоѓате. Тука е ветерот, мирисот на боровите или шумот од реките кои вие, и тоа како, ќе умеете да го насликате, а фотографијата сигурно нема да успее да го забележи.
Па, како би било да, за промена, спакувате неколку четки, неколку туби боја, малку сликарски медиуми, платно и да појдете во природа, да барате инспирација, за мотив, за слика? Ако очекувате инструкции и правила за сликање во природа - нема, можеме само да ве советуваме да се опуштите и да уживате, на тој начин добрите слики се загарантирани. А што носат оние кои често одат во вакви авантури?
Платно - Се разбира, платно нема да заборавите, само да ве потсетиме да размислите добро дали сакате да работите на платно кое е поставено на рамка и кое е најкомплицирано за транспорт или платно на картон кое е полесно и кај кое нема ризик да се искине. Можеби е паметно за првиот обид за сликање надвор да си обезбедите само блок со дебела хартија за сликање со акрилни и маслени бои, а сигурно нема да биде удобно со себе да носите платно со големи димензии. Треба да водите грижа и за тоа колкава површина можете да насликате во еден здив, за еден ден во природа.
Сликарски држач - Можеби не е нешто што е неопходно, вистина е дека можете платното да го наслоните било каде, но исто така вистина е и дека можеби таа положба нема да ви биде соодветна па ќе ви ја наруши концентрацијата и еланот. Најдобра опција е секако надворешниот куфер - штафелај со прегради во кој можете да го спакувате целиот потребен материјал, а кога ќе го расклопите ќе стане доволно стабилен сликарски држач на кој можете да го поставите платното.
Бои - Дали да понесете акрилни или маслени бои? Ние можеме да ве посоветуваме во случај да се одлучите за маслени бои да размислите на кој начин ќе ја вратите сликата во ателјте бидејќи сè уште ќе биде свежа. А ако се одлчите за акрилни бои имајте го на ум нивното брзо сушење кои дополнително ќе се забрза од сонцето и ветерот. Тоа можеби нема да ви смета на самото платно но може да биде проблем тоа што и бојата на палетата побрзо ќе се суши па можете да се послужите со вода и распрскувач и повремено да ги наводнувате боите - го споменавме овој трик и порано.
Четки - Што се однесува до четките, пред да ги изберете и спакувате запрашајте се колку четки всушност ви се потребни. Обично уметниците имаат проблем во процесот на сликање да се внесат и да користат само 2 до 3 четки на една слика, па ако сте и вие од таквите немојте беспотребно да носите цел пакет бидејќи поентата е да стигнете на дестинацијата желни за работа а не изморени од носењето на материјалите. Немојте да заборавите да понесете и ќесе со патент или нешто слично каде што ќе ги ставите четките откако ќе завршите. Ако ги спакувате така да не бидат во допир со воздухот бојата на нив нема да се исуши додека да стигнете до вашиот дом и додека не ги имате условите детално да ги исчистите.
Медиум - Ако се одлучите за сликање со маслени бои, ќе ви биде потребен и медиум со кој ќе ги разредувате боите но и терпентин во кој ќе ги чистите четките. Гледајте да најдете практични мали теглички со мала милитража и од темно стакло и во нив да ја сипете потребната количина на терпентин, ленено масло или медиум, нема потреба да ги носете со себе големите оригинални пакувања.
Визир - Ќе биде пожелно кога ја планирате композицијата и бирате дел од пејсажот кој ќе сакате да го сликате.
Марамчиња или крпа -За сите можни незгоди и стандардното бришење на четките и шпатулите.
Вода - Се разбира, и за сликање и за миење на рацете но и за пиење.
Капа - Иако звучи како нешто што не е неопходно, верувајте дека е. Сонцето ќе ви смета во согледување на боите, како оние од пејсажите така и за оние кои ќе ги мешате и ставате на платното, а наједноставен начин да го решите тој проблем е капата.
Обрнете внимание на бојата на гардеробата - Послушете го нашиот совет и избегнувајте ги јаките бои - најдобро е да се одлучите за црна или сиви нијанси на маица за да не бидете зачудени од изгледот на сликата кога ќе ја однесете во ателјето. Имено, јаките бои од вашата облека можат под влијание на сонцето да се рефлектираат на платното и да ве збунат.
Се разбира, немојте да се нервирате ако заборавите нешто па вашата идеја за сликање пропадне, бидејќи денот во природа никако не може да биде лош ден, посебно ако сте тргнале во оваа авантура со пријатели. Доволно ќе биде и да соберете добра енергија, неколку фотографии, и во мислите да го понесете сето тоа што фотографијата не може.
