На рачната изработка и се враќа популарноста во последните години и со право повторно го презема тронот. Причина за тоа сигурно е и тоа што материјалите се повеќе се достапни и лесни за работа, па ништо не и смета на креативноста ни кај професионалците ни кај оние кои рачните изработки ги прават како хоби и поради сопоствено уживање. Една од најсјајните звезди на пазарот за рачни изработка е накитот кој апсолутно ги копира предметите со кои сме опкружени е и таканаречената полимерна глина. Веројатно сте приметиле скоро некои обетки кои изгледаат како мини хамбургер, некој можеби прошетал покрај вас со неверојатно реалистична јагода околу вратот или сте биле воодушевени од некој приверзок за клучеви кој е толку добро изработен што сте се запрашале зошто некој носи вистински мафин во џебот. Сето тоа и уште многу повеќе може да се направи со овој материјал кој многу лесно се обликува, не е скап и им одговара и на аматерите и на професионалците.
Полимерната глина е производ на основа на поливинил хлорид полимер кој нам ни е уште попознат како PVC ( веројатно прозорците се прва асоцијација кога ќе го слушнете ова). Ова е маса кој со време стврднува, а за да го задржи обликот кој ќе и го дадете доволно е да ја оставите на висока температура (како онаа во вашата рерна) одреден временски период. Може да се каже дека нејзин близок роднина е пластелинот, но нејзините својстава се далеку поповолни за создавање на трајни уметнички дела додека истовремено е лесна за обликување скоро како и пластелинот. Овој материјал со мека текстура е достапен во многу нијанси што е уште една причина за да биде популарен и сакан меѓу уметниците. Исто така нејзино многу битно својство е тоа што не е токсична и е докажано потполна безбедна за употреба од страна на деца и возрасни.
Полимерната глина освен овој има уште многу називи и преводи на наш јазик, а тоа е можеби нешто што најмногу збунува кога се зборува за овој производ. Многу често ја нарекуваат и маса за моделирање а многу присутен назив е и FIMO. И на другите пазари се јавуваат различни називи, па така на англиско говорно подрајче се нарекува Sculpey. Оваа забуна може лесно да се реши- Sculpey и FIMO се всушност називи на брендовите. Не е воопшто ретка појава да се случи името на производителот чиј производ е омилен или вообичаен да се користи и како назив за самиот производ.
FIMO всушност е производ од познатата фирма Staedler. Првата полимерна глина некогаш направена се викала вака, па не е ни чудо да ни се случи и производите од останатите фирми да ги нарекуваме со истото тоа име. Денес FIMO може да се најде во повеќе варијанти - за професионалци, за хобисти и за аматери, а на сите заедничко им е квалитетот и големиот избор на бои кои допринесуваат за уште поголемо задоволство после работата. Освен глината, Staedler нуди и многу калапи за да можете полесно да обликувате, а изборот на облици во калапите гарантирано од секој прави вистински креативец. Горе спомнатиот Sculpey е исто така многу познат производ, па неговиот назив се користи како синоним, како FIMA. Тука се уште и Cernit, Premo и многу други.
Ако се прашувате кој критериум да го употребите при изборот на производителот, за жал нема некој генерален рецепт, секој од оние кои се на пазарот, како што е вообичаено, има свои добри и лоши страни. Cernit на пример е познат како најдобар избор за оние кои сакат да прават кукли, FIMO е најчест избор за оние кои прават накит, додека Premo ги фалат оние на кои најбитна им е нијансата на производот. Се разбира, се ова е индивидуално и искуствата се различни, добро е да испробате се во потрагата за она што би било соодветно за вас. Најважно е да се определите глината да ја набавите на безбедно место каде што ќе бидете сигурни дека производот е свеж и дека рокот не истекол.
Исклучително важно за полимерната глина е да знаете дека предметите ќе морате да ги фиксирате во рерна. Тоа и не е така комплицирано, ќе се сложите, секој ја има, а дефинитивно има и такви кои рерната ќе ја употребат прв пат и само поради овој производ. Секој производител ќе се потруди да ви даде точни упатства на колку степени и колку време ќе треба вашето изработено дело да го држите во рерна, и дали е потребно да ја загревате или не. Едно е сигурно - следете ги овие упатства дури и кога веќе имате доста искуство. Освен тоа, професионалците советуваат ако сакате да го промените времето во рерна, смеете само да го продолжите, никако да го намалите. Се препорачува, исто така, вашите креации да ги покриете додека се во рерната, можете за тоа да користите да кажеме алимуниумски садови - еден да ставите одозгора а еден долу.
