Доколку се занимавате со сликање или уживате во техниката декупаж или други слични техники, веројатно при набавката на материјали сте ги сретнале и структурните пасти и гелови и сте се запрашале на кој начин тие се користат и како вие би можеле да ги употребите на своите дела. Дури и ако веќе ги користите во голема мера, можеби нема да ги знаете сите нивни облици и можности бидејќи на пазарот често пристигнуваат новости од оваа категорија, па затоа можете да го прочитате нашиот денешен блог- постои шанса да дознаете нешто ново.
Структурна паста
Структурните паста или акрилните пасти за моделирање, како уште можете да ги најдете, во основа се смеса од акрилен медиум и соодветно полнење. Освен полнењето во акрилниот медиум можат да бидат додадени и пигменти кои ќе ја обојат пастата, како и различни честици кои ќе и ја променат стрктурата, па пастата ќе има ефект на ситен или груб песок, снежен ефект или фина структура со бисерен сјај. Значи, можете да ги купите во повеќе варијанти, но на сите структурни пасти заедничко им е тоа што ќе ги добиете како течна или густа смеса и по сушењето слојот ќе биде непроѕирен, цврст, водоотпорен и ќе има мат изглед.
Бидејќи се на водна основа, можностите со овие производи се прилично широки. Пред се, можете и сами дополнително да го менувате нивниот изглед додавајќи пигменти, акрилни бои, пигмент пасти, песок или некои други прашоци. Помешајте ги и нанесете ги со помош на сликарска шпатула, а подлогата може да биде дрво, сликарско платно, картон, хартија, па и стакло и метал со претпазливост во односот на дебелината на слоевите и со соодветна подготовка.
За да се исуши слојот од структурната паста потребно е најмалку пола час, а доколку слоевите се подебели тогаш и до неколку часови. Се додека е свежа можете да ја доработувате, да ја натискате, да цртате шари со остри предмети и гумени чешли, да додавате или одземате, но можете да работите и на исушените слоеви - да ги стругате, резбате, пресликувате со акрилни или маслени бои. До подебели слоеви секогаш е најсигурно да дојдете преку повеќе тенки слоеви, кои ќе ги оставите да се исушат пред да го нанесете следниот и така да го избегнете пукањето на пастата.
Начинот на кој структурните пасти најчесто се користат како дополнување на декупажот е во комбинација со шаблоните. За поситни шари одговараат фините пасти, како што се на пример Stencil пастите во боја, кои подобро ќе ги потполнат празнините и ќе добиете прецизни и мазни облици без остри рабови. Тие се компатабилни со сите производи на водна основа па со тоа се отвараат уште нови можности, а преку наполно сувите слоеви можете да работите и со производите на база на масло или разредувачи ( маслени бои, восочни пасти, лакови ) што би значело - играта никогаш не завршува.
Употреба на структурните делови
Структурните гелови, за разлика од пастите, по сушењето стануваат транспарентни и сјајни (освен ако користите посебен гел со мат ефект). Погодни се скоро за сите површини, како и пастите, но за разлика од нив слоевите од гел ќе бидат еластични, т.е овде нема ризик од пукање. Исто така, можат да се купат во неколку варијатни – како мат, сјајни, со ситни кристали или украсни каменчиња и во различни густини. Во сликарството со штафелаи посебно се корисни за мешање на акрилните бои и постигнување на дебели а и груби наноси кои го задржуваат својот облик и по сушењето - impasto (со оглед на тоа дека чистата акрилна боја има тенденција да се разлева и топи). Погодни се за постигнување на акрилна лазура – кога во гелот ќе додадете многу малку акрилна боја исушениот слој ќе биде обоен, но транспарентен и сјаен, а со повеќе вакви слоеви се постигнува право богатство слично како и со лазурите во сликарството со масло, но за многу пократко време.
И геловите даваат можност да ги комбинирате со други производи на акрилна основа или во нив да додадете разни прашоци, монисти и топчиња, а притоа се јако врзивно средство па можат да се користат и како лепак во колажите или за лепење на различни ствари во декупаж техниката. Примена имаат и како заштитни завршни слоеви, посебно геловите со висок сјај бидејќи создаваат ефект на стаклени површини.
Со оглед на тоа дека понудата на вакви производи на пазарот е голема, варијантите многубројни, а називите слични, ве советуваме да обрнете внимание на описот на производот како и на препораките кои производителите ги приложуваат со секој од нив, за да го купите токму тоа што ви е потребно. Меѓутоа имајте на ум дека во краткиот опис не можат да се најбројат сите можности и начини на кои можете да ги користите, па слободно можете да експериментирате.
