Дојдовме до идеја, во консултација со професионалци, за вас да направиме листа со најчестите грешки во текот на сликањето и употребата на боите воопшто, а додадовме и неколку совети кои можат да се слушнат само во студијата на уметниците со богато искуство. Веруваме дека многу од вас се запознаени со сето ова, но сигурно знаеме дека има почетници на кои советите кои ги собравме ќе им бидат од корист. Со оглед на тоа дека сликаството е широка тема, сето тоа го поделивме во неколку блогови за да не ве затрупиме со многу информации.

Акрилни бои и вода

Првиот совет се однесува на акрилните бои- според сликарите овде се прави често грешка и проблем кај почетниците, кои последиците умеат да ги препишат на лошиот квалитет на акрилните бои, без да знаат дека самите прават грешка. Имено кога користите акрилни бои на подлоги кои не впиваат многу е важно да знате дека препорачливо е боите да ги растворите со најмногу 30% вода. Зошто ? Ако во бојата додадете повеќе од околу 30 % вода, тоа ќе го промени составот на врзивните средства и ќе ја уништи нивната моќ за врзување па пигментите ќе останат слободни. При сликањето на наредниот слој со бои или при лакирање, без оглед на тоа што претходниот слој е сув, со четката ќе ги повлечете и пигментите кои не се сврзани за подлогата па боите ќе се мешаат и ќе создаваат нечисти тонови. Кога работите на хартија која апсорбира ова правило не е необходно да го почитувате, хартијата на свој начин ќе ги сврзе пигментите, но кога работите на подготвено платно кое нема таква апсорбирачка моќ, водете грижа. За сликање со лазури користете акрилен гел или медиум за глазура наместо многу вода.

Проблем со брзо сушење на акрилните бои

Во работата со акрилните бои се јавува уште еден проблем, а вие можеби не сте се сетиле на ова решение. Како што знаете, акрилните бои имаат својство да се сушат брзо, што некогаш им е предност а некогаш мана. Во случај која ви смета нивното брзо сушење подгответе шише со вода со фино распускување и со него повремено наквасете ги боите на палетата, наквасувајте ги насликаните партии на платното доколу сакате подолго да останат свежи, наквасувајте го и самото платно за боите кои се нанесени на него побавно да се сушат.

Мешање и чување на боите

Искусните сликари советуваат кога ги мешате боите секогаш во светлата боја да ја додавате темната, и така постепено ќе дојдете до нијансата која ви треба. Овој совет можеби ви звучи беспотребно и како нешто што дури и основците го знаат, но со обратната постапка може да се случи беспотребно да направите преголема количина на боја и истата да остане на палетата, да се исуши и да стане неупотреблива.

Доколку се случи да завршите со сликањето за денес, а да ви остане свежа боја на палетата, искористете стари, празни тегли со капак за да ја сочувате бојата до наредниот пат. Дури и пластичните чаши затоврени со стреч фолија можат да послужат за таа намена, битно е само бојата да не стои на отворено. Маслените бои можете да ги зачувате во затворена тегла или ако преку бојата налеете вода и кога ќе дојде време повторно да ја користите, водата истурете ја и бојата повторно ќе биде свежа. На пазарот од неодмна постојат и специјални палети со сунѓери кои бојата ја чуваат свежа, како и палети кои можат да се затворат па бојата во нив нема да се суши брзо како на отворената палета.

Избор на палета

Иако изгледа како споредна работа, палетата за сликарите е важен “алат“. За мешање на боите користете бела или светла палета и нека биде доволно голема, за да имате доволно простор за мешањето на боите и новите нијанси. И, се разбира, добро е тоа да биде пластифицирана подлога која нема да ја впива водата или маслото од боите и тако да го забрза нивното сушење. Посебно чувство е кога ја имате онаа вистинската дрвена палета со место за прст, која е заштитен знак на сликарите, но некои сликари повеќе ја сакаат белата палета поради подобра прегледност на боите. За некои сликари пак, попрактични се палетите за еднократна употреба, кои можат да се купат во вид на блокови, а некои се служат со бели пластични чинии какви што носиме на излет.

Грижете се за вашите четки

Четките никако не оставајте ги во вода, или уште полошо во терпентин! Да, ова е многу важно а едноставно правило и често се крши бидејќи во сликарскиот занес често се заборава. Ако четката подолго време остане потопена лепакот кој ги држи влакната на четката прицврстени ќе попушти и влакната ќе почнат постепено да паѓаат, а кај меките четки и обликот на влакната ќе се деформира. Ако го почитувате ова правило сигурно ќе им го продолжите векот на четките, што е добра работа за вашиот буџет, посебно ако во колекцијата имате скапи четки како оние за акварел од фини природни влакна. Чистете ги на време, не оставајте бојата на нив да се исуши за да не морате подоцна да ги третирате со јаки хемикалии.

Освен што уредно ќе ги чистите после работата, не заборавајте да ги чистите и во текот на сликањето. Доколку на четката во текот на мешањето на нови бои имате заостането боја со која претходно сте сликале, ќе ви се случи да создавате “валкани нијанси “и боите на сликата да го немаат интезитетот кој сте го замислиле. Значи, потребно е да водите грижа и за оваа ситница.