Акварел боиците се многу слични на обичните моливи и боици. На ист начин ги држите и работите со нив, на ист начин ги острите, на ист начин може и да ги избришете. А кога ќе додадете вода се случува магија. Значи можете да ги користите без ефект на водени бои и да имате совршени класични цртежи со боици или пастели. А ако сакате ефект на водени бои, додадете - вода. Предности на аквaрел боиците се тоа што лесно се користат, се релативно ефтини и после употребата нема хаос кој треба да го чистите. Содржат посебно средство кое се разредува во допир со водата и благодарение на него тие имаат ефект на водени бои.
Што се однесува до формата на боите, на располагање Ви се во форма на класични дрвени бои но и класични пастели со кои можете да цртате како со вообичаените верзии, а потоа да додадете вода ако сакате. Што се однесува до цврстината на дрвените бои, не постои некоја ознака или критериум, туку таа зависи од самиот производител, па најдобро е да пробате повеќе видови за да видите што најмногу Ви одговара. Имајте во предвид дека колку бојата е по мека, толку полесно ќе ја нанесете на хартијата.
Пастелите, како што рековме се произведуваат со додаток на врзивно средство кое се разредува во допир со водата, така што добивате акварел ефект. Ако сакате да пополните поголеми површини со боја или сакате тоа да го направите побрзо, пастелите се одлично решение затоа што се помеки и пошироки од дрвените боици. Бидејќи овие боици и пастели се релативно нови на пазарот, обично во нивниот назив е нагласено од каков карактер се, а не ретко производителите ги означуваат и секоја посебно така што на горниот дел ставаат знак како на пример сликарска четка или капки вода.
Како се користат акварел боиците?
Употребата е многу едноставна, како и кај обичните дрвени боици и пастели. Работите со нив на ист начин, користите исти острилки, а можат и да се избршат на ист начин. Максималниот потенцијал на акварелните боици можете да го извлечете со примена на вода на неколку начини:
1. Примена на влажна сликарска четка на цртеж насликан со боици или пастели - со сликарската четка натопена во вода поминувате преку линиите кои сте ги нацртале со молив или пастели. Интензитетот на нијансите зависи од количината на боја која сте ја нанеле на хартијата. Ако целта се интензивни нијанси, нанесете повеќе слоеви боја со моливот. За таа цел полесно ќе Ви биде да користите пастели од боици, или врвот на боиците нека биде тап. Применувајте ја четката селективно, не на сите површини, за да биде ефектот подобар. На крај, ако ја применувате секаде , подобро е да користите водени бои од почетокот.
2. Цртајте на влажна хартија - пред да почнете да цртате со боици или пастели, натопете ја хартијата со сликарска четка во умерени количини. Ќе добиете посебен ефект, цртежот ќе има многу меки и нејасни рабови. Не претерувајте со количината на вода и внимавајте боиците да не бидат премногу изострени, за да не ја пробиете хартијата.
3. Нанесете боја на четката - како што користите класични водени бои па со врвот на четката собирате боја од палетата, така можете да соберете боја со влажна четка од врвот на боиците или пастелите. Понатака сликате нормално, како да сликате со класични водени бои.
4. Натопете го врвот на боиците или пастелите пред да почнете да цртате - допрете го врвот на боиците и пастелите со мокра четка или едноставно натопете ги нежно со рацете и почнете да цртате. Ќе добиете потези на светли бои кои ќе станат послаби и потенки кога ќе се исушат.
5. Изострете боја од моливите - со помош на острилка изострете парчиња од врвот на моливот, ставете ги на влажна хартија или ставете ги на хартијата па испрскајте ја со вода и ќе забележите како бојата ќе се разлие. Ова е одлична техника за добивање текстура
Нема да штети ако уште еднаш напоменеме дека не би требало целата површина да ја покриете со вода по цртањето со боици или пастели. Суштината на овој прибор е спој на овие две техники. Ако не сакате да оставите некоја површина сува, можете кога се ќе се исуши деталите да ги направите по интензивни користејќи повторно акварелни боици и пастели. Наместо класични сликарски четки можете да користите и четки кои наместо рачка имаат резервоар со вода , на тој начин секогаш ќе бидете сигурни дека доволна количина на влага ќе стигне до врвот на четката, а со самото тоа и на цртежот.
Колку слоеви треба да нанесете?
Овде правилото не се разликува многу од онаа кај стандардните дрвени боици и пастели. Можете да нанесете колку слоеви сакате. Сепак, имајте во предвид дека ако нанесете премногу слоеви, кога преку нив ќе поминете со вода, нема да има ефект туку кал. Колку ќе се мешат боите, зависи од Вашите потези. Ако константно со мокра четка одите напред назад преку обоената површина повеќе пати, водата ќе го растопи целиот пигмент. Меѓутоа, ако сте премногу претпазливи па само со вода ја допрете површината, тоа нема да биде доволно за вистинскиот ефект - на овој начин ќе се растворат само пигментите на врвот.
Ако користите хартија со текстура, оваа карактеристика (дека пигментот се раствара само на врвот) можете максимално да ја свртете во Ваша корист – пробајте и ќе видите како посебниот ефект и длабочина се создава на овој начин. Малку пракса со овие бои и ќе го видите резултатот со сопствени очи па ќе Ви биде полесно да процените кои потези Ви одговараат. Нешто на што може не сте навикнале при користењето на класичните боици е да морате да водите сметка да врвот на боиците биде чист и да не содржи траги од други бои. Редовно чистете ги со крпа или парче хартија за да не Ви се мешат боите кога тоа не го сакате. Исто така, методот кој го применувате да ги претворите боиците во водени бои со влажни четки, бидете претпазливи и измијте ја четката при примена на различни слоеви на боја..
Обидете се во своите креации да ги комбинирате двете техники. Лесно и брзо ќе стекнете искуство, барем во споредба со другите техники, а резултатите ќе бидат оригинални, затоа што оваа техника сеуште ја немат разработено многу уметници па нејзините крајни можности сеуште не ни се ни приближно познати.
