Сликањето со маслени бои на платно е сериозна работа. Големите мајстори на уметноста создавале масло на платно, а денес оваа техника е избор на професионалците пред се. Во училиштата не ни дозволуваат ни да се приближиме до маслените бои (ако сте возрасни, сфаќате, замислете ги само дамките) и најчесто се дружиме со темпери и водени бои.
Затоа ако сакате да го пробате овој највреден сликарски прибор, ќе сфатите дека не знаете речиси ништо за него. Со самото тоа, уште поголема мистерија можат да бидат сликарските медиуми. Која е нивната намена? Која е разликата помеѓу сите овие видови на пазарот? Ова е доста широка тема така што сега ќе почнеме со одговорите на овие прашања и ќе се запознаеме со основните и најпопуларните средства.
Зошто се користат медиумите при сликање со масло на платно?
Медиумите се хемиски средства кои ни помагаат да ја контролираме должината на сушење на маслените бои на платно, нивната конзистентност и сјај по завршување на сликата. Медиумите можете да ги користите мешајќи ги со бои на палета или можете да ја натопите четката за сликање во нив по потреба, како што правите со водата при сликањето со акварели. Медиумите се важни затоа што сите тие прекрасни ефекти се создаваат со сликање со маслени бои на платно благодарение на слоевите на бои кои ги нанесувате на платното. За боите да бидат слоевити и композитски , потребно е слоевите да имаат различна брзина на сушење и флексибилност. Токму ова се постигнува со додавање на медиум.
Магијата со сликарските медиуми се создава кога ќе ги помешате со боја во правилен сооднос, а тоа е и една од причините зошто оваа процедура посебно ако сме лаици или немаме искуство ни се чини мистична или комплицирана. Повеќето медиуми по природа имаат нијанса која повлекува на жолтеникаво. Тоа значи посебна претпазливост при мешање со светлите бои, во спротивно и самите благо ќе пожолтат по сушењето.
Терпентин масло
По хемискиот состав, терпентинот е растворувач и е еден од најчестите и традиционално користени медиуми за сликање. Го забрзува процесот на сушење така што ја раствара бојата, а потоа испарува (исто како водата кај акрилните бои). Терпентинот е исто така добар за чистење на сликарските четки и незаменлив прибор во секое ателје. Ако сликате во слоеви, терпентинот користете го за свој основен, прв слој, бидејќи секогаш треба прво да нанесете слоеви кои брзо се сушат.
Рафинирано ленено масло
Ова е најпопуларниот медиум за маслени бои. Рафинираното ленено масло го забавува времето на сушење, што може да биде многу корисна карактеристика, ако боите во слоеви. Нека Вашето мото биде „Бавно преку брзо“, прво насликајте ги слоевите кои брзо се сушат, а потоа за секој следен слој кој ќе го додадете ќе биде потребно повеќе време да се исуши. Така што можете да додавате за секој слој што повеќе медиум. Овој медиум, меѓу другото го зголемува сјајот и транспарентноста како и коегзистенција на маслените бои.
Stand ленено масло
И овој медиум се добива од ленено семе, но разликата во однос на претходното е што ова е оставено да отстои (оттаму и називот eng. Stand = стои) и да се згусне. Исто така разликата е и во начинот на производство, за разлика од рафинираното ленено масло оваа масло се добива со изложување на лененото семе на високи температури во процесот без присуство на кислород. Тоа значи дека е по концентрирано и дека можете да го користите во помали количини. Ако неговата густина Ви пречи, можете да го разредите со терпентин. Освен што го продолжува периодот на сушење, функцијата на stand лененото масло е да даде дополнителен сјај. Исто така, тоа е омилен производ на сликарите кои сами ги произведуваат своите бои.
Направи сам медиуми
Медиумите можете и сами да ги направите но денес се достапни високо квалитетни веќе готови медиуми со различни намени. Ако сте почетник нема потреба да навлегувате во тоа затоа што некој од пазарот сигурно ќе ги задоволи Вашите основни потреби, а подоцна кога ќе се запознаете со маслените бои и тоа како тие се однесуваат можете сами да правите своја мешавина и да ја прилагодите на својот начин на сликање. Исто така, до некои состојки не е едноставно да се дојде или потребни се посебни процеси за тие да се поврзат со другите компоненти, што е уште една причина зошто Вие како почетници сепак треба да се одлучите и да купите готови супстанции.
Сето ова што го наведовме може да се користи и само (терпентин, рафинирано масло, stand масло) но најдобро е кога ќе се направи мешавина во одреден сооднос затоа што секоја од овие состојки ако се користи во голема количина може да ја оштети сликата (терпентинот ја намалува моќта на врзување, маслото го забавува сушењето и пожолтува). Сепак, ако се одлучите да сликате и потребно Ви е универзално и брзо решение кое ќе користи во сите слоеви, тоа може да биде мешавина од тепентин, ленено масло и неколку капки damar лак.
