Декупаж техниката ни е одамна позната и омилена на сите. Поради својата едноставност постои многу долго. Идејата да пренесете мотиви од салфети на парче мебел и многу други површини така што тој мотив изгледа како да е нацртан со вешти раце па уште и да потекнува од некои дамнешни времиња , на сите многу ни се допаѓа, а задоволството е уште поголемо кога ќе видите колку лесно се применува оваа техника.
Работата е уште полесна со растворот за трансфер на фотографии - неговото постоење и лесна примена значат дека не морате повеќе да се ограничувате на мотивите кои ги наоѓате на салфетите. Со овој трансфер можете да пренесете било каква фотографија, црно-бела или во боја, испечатена на обична бела хартија која се користи за ласерско печатење, на мазна површина, дрво, ткаенина па дури и на гума.
Што е потребно?
Освен самиот раствор, секако ќе Ви биде потребна и подлога. Нека биде чиста и мазна. Ако се работи за дрво проверете дали површината е полирана и отстранете ги честичките прашина кои можат да делуваат како нерамнини. Ако се работи за ткаенина исто така добро избришете ја. За примена на растворот ќе Ви биде потребно чепкалка за уши, како и дрвена шпатула или стапче ( како на пример стапче од сладолед или за преглед на грлото кај доктор). Исто така ќе Ви биде потребен малку памук или марамче и секако испечатениот мотив што го пренесувате.
Можете да користите некоја Вашата фотографија, само да не биде оригиналот туку прво направете копија на хартија, можете на пример да најдете мотив или фотографија на интернет која Ви се допаѓа и да ја испечатите. Како што веќе рековме, не е потребна посебна хартија, ако дома имате принтер, хартијата која ја користите за него ќе биде одлична, а истото важи и за хартијата која ја користат во најблиската копирница. Само изберете мотив кој Ви се допаѓа и кој може да се вклопи на површината што ја имате замислено. Ако пренесувате на ткаенина, ќе Ви биде потребно уште едно помагало - пегла, а за хартијата да не се поместува при нанесувањето на трансферот, набавете селотејп или леплива трака.
Трансфер на дрво
На хартијата на која е испечатен мотивот отстранете ги празните делови за да не Ви сметат при нанесување на трансферот. Поставето го мотивот директно на површината која сакате да ја украсите (значи фотографијата ја ставаме директно на предметот кој го украсуваме, а трансферот го нанесуваме на задната страна на фотографијата). Залепете ги со самолеплива трака рабовите на хартијата на површината за да не се поместува додека го нанесувате трансферот. Натопете ја чепкалката за уши во шишето со трансфер, ако мислите дека апсорбирала премногу раствор, отстранете го вишокот со марамче.
Нанесете трансфер на целата површина на хартијата. Додека го нанесувате ќе забележите дека мотивот се гледа и на страната на која го нанесувате трансферот. Кога ќе покриете отприлика една четвртина од хартјата, направете пауза во нанесувањето и делот на кој има трансфер рамномерно претиснете го со дрвена шпатула за да бидете сигурни дека секој дел од мотивот сте го пренеле на дрвото. Потоа нанесете трансфер на наредната четвртина, па повторете ја постапката со дрвената шпатула. Кога ќе ја поминете целата површина на хартијата на која е фотографијата која ја пренесувате, внимателно отстранете ја хартијата од површината со лепливата трака. Ќе забележите дека целиот мотив сега е на украсената површина, со ефектот на патина карактеристичен за декупажот.
Трансфер на ткаенина
Доколку предметот на кој ја нанесувате фотографијата има две страни, како на пример мајца или торба, задолжително поставете картон под ткаенината, за мотивот да се преслика само таму каде што сакате. Постапката за пренесување со чепкалка за уши и дрвена шпатула ќе биде иста, само што при трансферот на ткаенината , прво, по преминoт со шпатула ќе поминете преку површината и со пегла на умерена температура, и второ, ќе ја поминете површината со трансфер шпатула и пегла еднаш, а потоа уште еден слој трансфер и притисок со дрвена шпатула, по што ќе ја отстранете хартијата и ќе ја испеглате површината уште еднаш. Не заборавајте да ја исклучите пареата, ако Вашата пегла ја има таа опција.
Како и за сите вештини, ќе Ви биде потребно малку вежба. Важно е да не нанесeте ни премногу ни премалку трансфер на стапчето, како и добро да го процените притисокот на дрвената шпатула. Ако нема многу трансфер на стапчето, со дрвената шпатула лесно ќе направете притисок и подобро ќе се пренесе сликата на подлогата, така да за почеток важно е добро да ја процените количината на трансферот. Почнете на мали површини за малку вежба, а покасно можете брзо и лесно да декорирате мебел и големи парчиња облека. За дрвените предмети не е потребно фиксирање, односно не морате да користите уште некој производ за заштита, додека кај ткаенината фиксирањето го правиме со пеглањето.
