Инспирирани од едно од вашите прашања, решивме да го направиме овој експеримент за да можеме да одговориме на прашањето со информации од прва рака. Што да правите со четките кои не сте ги исчистиле после користењето? Ние сеуште стоиме на тоа дека четките треба да ги исчистите додека бојата на нив е сеуште свежа и тоа што побрзо. На тој начин ќе го продолжите нивниот век, ќе го зачувате обликот на влакната и нивната мекост бидејќи нема многу да ги “малтретирате“. Meѓутоа понекогаш се случува да заборавите, да немате време или волја за чистење на четките бидејќи целата енергија сте ја потрошиле на сликата. Што тогаш? Да ги фрлите - жал ви е. Да ги исчистите - би сакале, но немате идеја како?
Резултатот од нашиот експеримент е добра вест за вас – знаеме решение. Растворувачите чија моќ ја споредивме за оваа прилика се: нитро разредувач, маслен разредувач и терпентин. Она што можеме да ви го откриеме е следното: можете да ги зачувате четките со било кој од овие растворувачи, со таа разлика што нитро разредувачот ќе го направи тоа најбрзо и најдобро (доволно е да ја оставите четката во него околу еден час). На маслениот разредувач ќе му биде потребно повеќе време (околу два часа), додека на терпентинот ќе му биде потребно многу повеќе и неговата моќ за растварање на исушената маслена боја е најслаба така што сепак него би го препорачале за користење на четки на кои бојата сеуште не е потполно исушена.
Ставете еден од овие растворувачи во стаклен сад ( препорачуваме стаклен, керамички или слично, избегнувајте ги пластични садови бидејќи растворувачите можат да ги растопат и нив) и едноставно потопете ја четката во него. Внимавајте четката да биде во садот само до металниот дел за да не се оштети лепакот кој ги држи влакната на четката за истите подоцна да не испаднат. Исто така, водете сметка ова да го правите во просторија во која циркулира воздух или најдобро надвор (на тераса, двор) бидејќи вдишувањето на испарувањето од овие материи не е препорачливо.
Оставете ја четката потопена еден, два часа или преку ноќ доколку користите терпентин. Повремено извадете ја четката и избришете ја со хартиено марамче или крпа за да ја отстраните бојата која веќе е растворена, па повторно вратете ја во растворувачот. Сами ќе процените кога е време за следниот чекор, само внимавајте четката да не остане предолго во нитро или маслениот разредувач бидејќи може да ги изгори влакната. Кога четката ќе ја извадите од садот, избришете ја добро и отстранете ја растворената боја. Четката потоа задолжително измијте ја со сапун или средство за миење садови се додека од неа излегува боја, па оставете ја во хоризонтална положба да се исуши.
Доколку забележите дека влакната се “ растргнати на сите страни“ ( што е можно бидејќи се третирани со силни хемикалии) можете да попрскате со малку лак за коса, со прсти да ги наместите во првобитниот облик и така да ги оставите да се сушат. Металниот и дрвениот дел од четката можете да го исчистите со крпа на која сте ставиле малку нитро разредувач. Посебно бидете внимателни со четките од фини, природни влакна- нив држете ги што пократко во разредувачот. Четката нема да биде ’’како нова“ после овој третман, но ќе биде сосема употреблива и подготвена за нови походи.
