Медиумите за сликање со маслени бои се доста комплицирана тема, а уметниците нема да се срамат да ви кажат дека и ним им се непознати и дека поради нив не пробале сликање со маслени бои. Не е тајна ни тоа дека зад објаснувањето кога и кој медиум треба да се користи се крие науката и тоа хемијата, што на уметниците може да им делува апстрактно и непознато.
Но сепак, со оглед на тоа дека најлесно ќе дознаете како да ги користите и кој медиум вам ќе ви одговара така што ќе експериментирате со нив, овде можете да најдете добра доза на креативност. Постојат класични медиуми како терпентин и ленено масло, а овде се и оние кои поретко се користат, па затоа и повеќе се непознати. Пред вас се некои од маслата кои поретко се користат и кои можат да се употребуваат самостојно, а може да бидат и една од компонентите на медиумите кои сами ги правите или ги купувате како веќе подготвени.
Масло од шафран
За сликарите кои сакаат најјасни можни бои и кои сакаат да ја елиминираат секоја можност боите да пожолтат, маслото од шафран е замена за лененото масло. Сепак, треба да се има на ум дека површината на која е користено маслото од шафран после сушењето не е толку цврста, како што е случај со оние површини на кои се користи лененото масло. Во секој случај, шафранот е поефтин од ленот а овде е и фактот дека можете да го користите и како средство за чистење на сликарските четки. Многу слично на ова масло е маслото од сончоглед кое, се разбира поинакво подготвено, се користи и во сликарството и е исто тако достапно на пазарот.
Масло од мак (афион)
Уште едно масло со чија помош ќе го избегнете пожолтувањето на боите, а кое најчесто се користи за светли и сини бои. Маслото од мак е транспарентно и ќе им даде на вашите бои структура на путер. Ова масло се суши побавно од маслото од шафран. Потребно е 5-7 дена за тоа, па не е погодно да се користи во првите слоеви на сликањето, но е одлично за техниката мокро на мокро.
Ореово масло
Ова масло има бледо-жолтеникава кафеава боја и карактеристичен мирис. Тоа е лесно масло и неговата цел е да ги направи маслените бои потечни. Добро е за светли бои. Пожолтува помалку од лененото масло а повеќе од маслото од шафран. Потребно е 5-6 дена да се исуши. Ова масло не е ефтино, но како што е и случај со сликарскиот прибор генерално, плаќате за квалитет.
Интересно е исто така, дека ова масло на некој начин е поприродно од останатите, посебно од лененото, па го користат многу уметници кои мака мачат со алергии. И покрај многуте позитивни особини, ова масло не е толку често во употреба поради цената а и поради рокот на траење. Неопходно е да се чува во фрижидер за да не се расипе.
"Boiled" сликарски масла
Овде се работи за масла што се загреваат за да се создаде супстанца која го забрзува сушењето. Со тек на времето потемнуваат и пожолтуваат, па најдобро е да ги користите за темни бои и за првите слоеви. Ако не сте сигурни во резултатот кој ќе го постигнете со нивното користење најпрво испробајте ги, немојте да ризикувате да ја уништите целата слика..
Идеалниот медиум е безбоен, траен, флексибилен и не влијае на бојата на пигментите. Треба добро да се знаат одликите и перформансите на секој од нив за да го одберете оној кој ќе одговора на вашата техника и на посакуваните резултати. Кога се работи за потребната количина, не плашете се – користете го здравиот разум. Потребна е рамнотежа, и премногу и премалку може да ве одведе до непосакувани резултати. Исто така немојте да мислите дека нема да можете да сликате без медиуми, многу сликари токму тоа и го прават. Не дозволувајте вашиот страв од хемијата која со себе ја носат медиумите да ве спречи да пробате сликање со маслени бои. Направете го тоа експериментално, дознајте најпрво какви се резултатите кога воопшто и не ги користите медиумите, па потоа обидете се сами да ја откриете количината и совршениот вид за вашите дела.
