Сигурно сте се нашле во ситуација да не сте задоволни со сликата која сте ја насликале и ниту после милион обиди да се поправи нешто сепак не е тоа тоа. Сакате да започнете сосема нова слика бидејќи сте веќе уморни од оваа, но сепак....што да се направи со тоа платно? Сигурно нема само така да го фрлите целото?
Прв совет:
Скријте ја сликата од себе некое време.Зошто? Можеби едноставно ви здодеала, вашите очи се презаситиле со тие бои и форма, а можеби сликата и не е баш толку лоша. Ако не гледате во неа околу 10-15 денови може да се случи кога повторно ќе ја видите да го пронајдете проблемот и ќе сфатите дека со мала обработка може да се добие феноменално дело.
Втор совет:
Искористете ги боите од старата слика за сосема нова слика. На кој начин? Кога ќе направите скица за нова слика, размислете дали можете да ја вклопите бојата што веќе се наоѓа на некои делови во целосно нов состав. На крајот на краиштата, повеќето сликари не сакаат да започнуваат да сликаат на целосно бело платно и честопати ставаат слој од разредена црвена или жолта боја како позадина. Но, обрнете внимание на деловите каде што има видливи потези со четки или повеќе слоеви на боја што направиле нерамномерност - потрудете се подоцна на овие делови да не се најдат некои детали што треба да бидат обоени фино и детално - портрет, на пример
Трет совет:
Старо ново бело платно. Ако на таа стара слика нема изразена текстура ова можеби е и најуспешното решение: Титаниум бела боја (акрилна или маслена, во зависност од тоа какви бои се наоѓаат под) премачкајте го целото платно во тенок слој или во повеќе тенки слоеви доколку на сликата се наоѓаат претежно темни нијанси. Ќе потрошите доста бела боја која обично секогаш недостига но, тоа е тоа. Можеби не мора да биде и бела боја, размислете за сликање на црна позадина.
Четврти совет:
Ново бело платно. На платното постојат многу слоеви на боја, видливи се потезите и текстурата и премачкувањето со бела не е решение бидејќи нема да биде рамно? Заменете го платното. Ok.Трпеливо извадете ги сите шајќи со кои е затегнато платното на дрвената рамка и извадете го платното (може да го исечете на помали парчиња и да ги искористите за минијатурни слики, како на пример хартија).Потоа прицврстете ново платно за сликање на дрвена рамка, кое можете да го купите во ролна.
