Цртеж е било каков вид на оставање на трага на површина на која тој ќе биде видлив, со било кое средство. Секој од нас е способен да направи таков траг, што значи дека секој од нас може да црта. Можете да го напишете своето име? Ако одговорот е да, тогаш можете да почнете да цртате, а сите изговори за недостаток на талент, заборавете ги.
Вистина е дека некои од нас цртаат подобро а некои полошо. Зошто е тоа така? Дали е тоа само поради магијата наречена талент? Секако дека не. Во прашање се неколку работи кои мора да се поклопат за да може вештината на цртање да биде ваша. Прво мора да имате волја и желба, потоа да побарате инструкции кои ќе ве упатат во цртањето, а на крај потребно е да вложите време во вежбање, односно многу вежбање. До добри резултати ќе дојдете само ако ги земете во обзир овие неколку совети, но мора да знаете дека ова не се тајни формули кои ќе ве претворат во вешт цртач, туку само насоки кои ќе ви помогнат во тој пат.
Вештини за цртање
Цртањето не е вештина со која мора да се родите, туку се учи и се усвојува со тек на време. Ако сакате да цртате, ако сакате подобро да цртате или пак да станете вистински професионалец - секако дека можете. Затоа, немојте никогаш да си дозволите да кажете „не можам да цртам“ и да останете на тоа, иако сакате да биде поинаку.
Во цртањето, треба да потрошите половина од вашето време на набудување
Ова секогаш треба да го имате на ум. Дали ќе можете да фотографирате нешто ако не ја насочите камерата кон него? Се разбира не. Многу луѓе имаат погрешен став на самиот почеток и не поминуваат доволно време гледајќи во предметите што ги цртаат, па затоа се разочарани од резултатите. Мора да разберете дека сè што пренесувате на хартија прво треба да си го разјаснете со тоа што ќе му пристапите, чувствувате, ќе барате друг извор доколку е потребно, а потоа да цртате.
Користете повеќе извори
За да може да се запознаете со она што ќе го цртате, потрудете се да пронајдете што повеќе материјали. И запомнете, не само цртежите засновани на жив модел заслужуваат внимание. Кога сакате да нацртате лав, секако дека нема да одите во Африка, туку ќе користите фотографија, но ако таа фотографија не ви каже доволно, најдете уште две-три.
Започнете со основни форми
Кога цртате предмети, потрудете се во него да пронајдете основни форми. Сè на светот содржи круг, квадрат, триаголник или правоаголник. Пронајдете ги и изградете го вашиот цртеж врз основа на нив - ова ќе ви помогне добро да ги поставите основните маси и односите на големината.
Осветлена или исенчана површина
Само кога ќе направите поделба помеѓу осветленатаи исенчаната површина на предмот на кој цртате, вашата работа ќе добие сериозност и длабочина. Потрудете се да ги пренесете веродостојно, во што поголема вредност, односно јачина (интензитет).
Линии
Потрудете се на вашиот цртеж да имате линии со различни дебелни, со тоа цртежот ќе бил поинтересен. Употребата на различни моливи може да ви помогне во тоа, од оние со ознака H што оставаат лесен и тенок белег, до моливи со ознака B чијашто линија е темна и јасна.
Добар цртеж се постигнува со вежбање
Вежбањето е тајната на секој успех, така што ќе донесе резултати и во овој случај. Носете секогаш со вас блок и неколку моливи и нацртајте сè што гледате околу вас. Цртајте секој ден, а кога не цртате, набудувајте ги работите и испланирајте како тие можат да бидат пренесени на хартија, каква основна форма гледате во нив, од каде доаѓа светлина и каде се појавуваат сенки, и размислете која алатка за цртање би била соодветна за тоа цртање.
