Боите за стакло се еден од оние производи на современиот пазар на хоби материјали со чија помош секој од нас може да ја изрази својата креативност. За сликање на стакло можете да ги користите класичните акрилни бои, со оглед на тоа дека тие се наменети за секаква површина, но за што подобар и потраен ефект на располагање ви се и боите кои се произведени за оваа специфична површина, со чија помош на старите вази и чинии можете да им дадете нов сјај, да им дадете личен печат на чашите за вино кои ќе ги подарете некому или од обичните тегли да направите уште еден украс.
Боите за стакло доаѓаат во различни варијанти и пакувања и можат да се применат на различни начини. Она што е многу важно да го знаете е дека нивната трајност на површината во повеќето случаи е гарантирана од печењето. Многу е важно да размислите дали производот кој планирате да го декорирате може да се стави во рерна или микробранова печка после нанесувањето на бојата. Исто така при изборот на марката и варијантите, проверете на етикетата на бојата за да видите колку е потребно да се пече предметот во рерна и на колку степени за да можете после тоа нормално да го миете рачно или во машина за садови. Доколку се работи за предмет кој не може да се стави или физички да се пренесе во машина, своите цртежи можете да ги фиксирате со помош на фен за коса.
Подготовка на површината и видови боја
Се разбира, на пазарот ќе најдете различни видови боја. Една од основните разлики е дали се работи за транспарентна или нетранспарентна боја а оваа разлика може да биде многу значајна за вас при изборот на боите. Значи, не е битно само прашањето за нијансата тука и тоа дали и бојата која ќе ја примените на стаклена површина ќе биде проѕирна ( најчесто нијансите на оваа боја се означени како transparent) или не (означени се со зборот opaque). Кога ќе се одлучите за визуелниот ефект кој го сакате, важно е да знаете дека ако сакате нијансата да биде појака, можете да примените уште еден слој- 20 минути до 1 час откако првиот слој ќе се исуши. Ова важи и за двата типа на бои, со тоа што кај транспарентните во случај на додатни слоеви, го намалувате ефектот на транспарентност. За подобро да можете да ги видите своите потези, во внатрешноста на предметот кој го боите, ставете парче хартија или марамче.
Што се однесува до површината, многу е важно да биде чиста и на неа да нема никакви честици, видливи или невидливи, за да бидете сигурни дека бојата успешно ќе се прими онаму каде што вие сакате. Измијте го предметот кој го декорирате со млака вода и детергент. Пред некои бои е пожелно, а понекогаш и неопходно, да ја исчистите површината со алкохол. И во овој случај проверете ја етикетата на производот. Пред да користите алкохол или детергент многу е важно површината да биде потполно сува, а тоа можете да го постигнете со хартиено марамче или памучна крпа.
Избор на четка и начин на примена
Што се однесува до четката, можете да се одлучите за четка со синтетички или природни влакна. Ефектот е речиси ист, со тоа што доколку сликате со природни влакна, цртежите делуваат помеки, но имајте предвид дека четките со синтетички влакна се секогаш поефтини. Што се однесува до обликот, изберете го оној кој одговара на вашата замисла, а најсигурни сте со четките со округла форма и средна дебелина. Ако не сте многу вешти во сликањето, шаблоните кои можете да ги пополнете со помош на сунѓерестите четки се идеално решение.
За полесно сликање, можете прво да исцртате контури на идната слика. За тоа можете да употребите перманентен маркер кој нема да се гледа кога преку него ќе поминете со боите за стакло, а можете да се одлучите и за некои од специјалните контури кои се како пенкала. Тие ќе се гледаат и ќе му дадат на вашиот декориран предмет посебен ефект, а вам ќе ви го олеснат сликањето, бидејќи доволно ќе биде внатрешноста да ја пополните со боја. На ист начин можете да користите и маркери за стакло, само за контури, но со нив можете да го направите и целиот цртеж на стаклото. Многу е важно боите за стакло никако да не ги мешате со вода. Бидете внимателни и при работата со четката на неа да нема задржено вода после миењето со оглед на тоа дека тоа може да ја загрози адхезијата на вашите бои за стакло.
Пред употреба добро протресете го пакувањето на бојата, а бидете подготвени на тоа дека и додека работите понекогаш ќе мора да ги промешате. Доколку направите грешка при работењето или вашиот конечен резултат не ви се допаѓа, бојата можете многу лесно да ја отстранете. Оставете го предметот во млака вода помешена со детергент преку ноќта и веќе следниот ден можете да почнете повторно.
