Ако се обидете класичните маслени бои да ги помешате со вода ќе се случи токму тоа што и очекувате - нема да успеете. На сите ни е добро познато дека маслото и водата се течноси кои не можат да се соединат, па сигурно се прашувате каква тајна кријат маслените бои кои се разредливи со вода. Тајната е во тоа што тие содржат масла кои се модифицирани со одредени додатоци, па наместо да ја одбиваат водата овие бои со неа успешно се мешаат и разредуваат.
Неколку брендови во својата понуда вклучија серија на вакви бои и тоа предизвика задоволство како кај голем број на професионални сликари, така и кај оние кои со сликарство се занимаваат како хоби. Имено многу често кај сликарите се појавува алергија од медиумите или терпентинот со кои маслените бои се разредуваат, па се принудени да се откажат од сликањето со маслени бои и да преминат на работа со акрилни бои иако акрилните бои се значително поинакви и не одговараат на навиките и потребите на сите сликари. Многу од нив немаат адекватно ателје за работа, а поради јакиот мирис и штетните испарувања не можат да сликаат со маслени бои и да ги чуваат таквите дела во просториите во кои го минат и остатокот од денот. На некои маслените медиуми им изгледаат премногу комплицирано па поради тоа не се впуштаат во работа со маслени бои, а оние кои немаат вакви проблеми се одлучуваат за маслени бои кои се разредуваат со вода бидејќи се секако попријатни и поедноставни за работа.
Кои се предностите на маслените бои кои се разредливи во вода
Основна предност им е токму тоа што можат да се разредат со вода, како и тоа што приборот кој го користите во текот на сликањето можете да го измиете само со вода, нема да ви бидат потребни никакви хемикалии. Уште една добра страна од нивното користење е тоа што сушењето трае нешто пократко отколку кај класичните маслени бои, но сепак доволно долго за сликарот да има можност за техника како што е “alla prima“. Во текот на работата и после сушењето имаат потполно ист изглед и исти карактеристики како и боите разредени со маслени медиуми – меки потези, висока сјајност и интензивност.
Како се слика со маслените бои кои се разредливи во вода?
Пред се, не постои ограничување во односот на вода и боја - вода можете да користите во количината која ви е неопходна за да ја добиете густината која вам ви одговара за вашата техника на сликање. Можете и да не додавате воопшто вода туку да сликате со густата боја од тубата, можете да додадете мал процент на вода и да направите боја која лесно ќе се нанесува со сликарска шпатула или цврста четка, а со употребата на поголема количина вода или додавање на боја во водата ќе добите ефект на акварел.
Водата не е единственото нешто што можете да го мешате со овие бои - тука се и неколку помошни производи како сликарски медиуми, глазурен медиум, сликарски пасти, различни видови завршни лакови и сите тие исто така се разредливи со вода. Со нив ќе ви се прошират можностите, но ќе ви биде потребно малку време и трпение додека да ги запознаете и да ја откриете комбинацијата која најмногу ви одговара.
Сликарскиот медиум ќе ја направи бојата потранспарентна, потечна и слевите после сушењето ќе имаат поголем сјај од оние кои сте ги мешале само со вода. Глазурниот (glazing) медиум можете да го користите доколку сакате својата слика да ја сликате со глазури – тенки, проѕирни слоеви боја и препорачливо е да се користи во завршните слоеви, а сликарската паста од оваа серија е всушност водо-разредлива маслена боја без пигменти и неа можете да ја користите кога сакате релјефни наноси и видливи потези,- бојата ќе остане густа но потранспарентна и со послаб интезитет.
Како што можете да заклучите и сами – со овие додатни производи голем е бројот на можностите кои ги имате со овие бои, па скоро и да нема ограничувања ни во сликарските техники. Без разлика дали својата слика ја сликате со еден слој од техниката “ мокро на мокро“, било да ја сликате со глазури, во слоеви или го негувате релјефното сликарство, маслените бои кои се разредуваат со вода ќе ви го овозможат тоа исто како и класичните.
Морате да обрнете внимание само на тоа дека правилото за сликање во слоеви се разликува од она кое важи кај сликањето со класични маслени бои. Кога бојата ја разредувате со маслени медиуми правилото гласи “ мрсно преку посно “ а тоа би значело дека почетните слоеви ќе ги сликате со помалку ленено масло во медиумот од завршните а кај боите кои се разредуваат со вода важи правилото дека првите слоеви содржат повеќе вода а секој нареден слој помалку од претходниот, додека за завршниот слој се препорачува користење на чиста боја или боја разредена со медиум и glazing медиум. Треба да се почитува и правилото за нанесување на дебели слоеви преку тенки а не обратно, за да не се јави пукање кај последните слоеви.
Подлога за сликање може да биде платно или картон, вообичаено, но задолжително е подлогата да биде подготвена за работа со масло. Цел останат прибор е ист кој се користи и кај класичното маслено сликарство. Завршната слика бара слој од заштитен лак – после 6 месеци до година дена сушење, зависно од дебелината на нанесената боја потребно е да се нанесе некој од завршните лакови кои се наменети за маслените слики. За оние кои не го поднесуваат мирисот на испарувањето на класичните лакови тоа може да биде и лак од серијата на водо-разредливи маслени производи кој е без мирис – што значи дека и овој дел од работата е исто олеснат и пријатен.
.
